Mae’r wybodaeth hon yn berthnasol i Gymru, Lloegr, yr Alban a Gogledd Iwerddon

Arbed arian ar filiau olew wrth wresogi’ch cartref

Mae prynu olew i wresogi’ch cartref yn medru bod yn ddrud. Mae rhai cwmnïau’n mynnu eich bod yn archebu lleiafswm uchel o olew ac yn gofyn am daliad ymlaen llaw.

Os ydych chi am osgoi biliau mawr, mae ymuno â defnyddwyr eraill i ffurfio clwb olew yn medru bod yn ffordd wych o arbed arian ar gostau tanwydd. Mae pobl sydd eisoes wedi cofrestru ar gyfer clybiau olew wedi gweld eu bod yn medru arbed arian trwy ddod at ei gilydd i archebu mwy o swmp o olew.

Sut mae clybiau olew’n gweithio

Mae clybiau olew yn grwpiau o bobl, mewn ardaloedd gwledig yn bennaf, sy’n cyfuno’u harchebion am olew i wresogi’r cartref. Maen nhw’n amrywio o ran maint, o ychydig o aelodau i sawl cant. Maen nhw hefyd yn cael eu galw’n syndicadau olew, grwpiau prynu olew neu fentrau olew cydweithredol.

Trwy ddod at ei gilydd i brynu swmp o olew, mae clybiau olew yn medru cael gwell dêl gan gwmnïau sy’n dosbarthu olew. Mae cyfuno archebion hefyd yn golygu llai o siwrnai i ddosbarthu’r olew, gan ostwng tagfeydd ar heolydd. Mae hefyd yn tarfu’n llai ar bentrefi, oherwydd mae pawb yn medru cael yr olew ar yr un diwrnod.

I ddarganfod os oes clwb olew yn eich ardal chi yng Nghymru a Lloegr, rhowch glic ar y map hwn a gynhyrchwyd gan Cyngor ar Bopeth

Os ydych eisoes yn aelod o glwb olew, fe fyddwch yn medru gosod y clwb ar y map hwn.

Sefydlu clwb olew

Os nad oes clwb olew gerllaw, efallai y gallech feddwl am sefydlu clwb o’r fath. Mae’n medru cymryd tipyn o amser i’w drefnu, ond fe allai arbed arian i bawb yn eich cymuned.

I gael help a chyngor ar sefydlu clwb olew, gweler Sefydlu clwb olew: gair o gyngor

Cofiwch fonitro newidiadau mewn prisiau a phrynu ymlaen llaw

Un ffordd o arbed arian ar olew wrth wresogi’ch cartref yw monitro’r newidiadau mewn prisiau. Yn aml, mae olew i wresogi’ch cartref yn ddrutach dros y gaeaf gan fod mwy o alw amdano. Mae’n medru bod yn ddefnyddiol sicrhau bod eich tanc yn llawn yn yr haf er mwyn osgoi bil uchel yn y gaeaf.

Ffyrdd eraill o arbed arian ar filiau i wresogi’ch cartref

Rydych hefyd yn medru arbed tipyn mwy o arian ar filiau tanwydd trwy ddefnyddio ynni mewn ffordd effeithlon, ac mae’ch aelwyd yn medru bod yn gynhesach ac yn iachach o ganlyniad. Mae grantiau a chynlluniau gostyngiad ar gael i’ch helpu i ddefnyddio’ch ynni’n well, er enghraifft help gyda chostau inswleiddio. Hyd yn oed os ydych yn gorfod talu rhai o’r costau hyn eich hun, fe all yr arbedion ar filiau tanwydd ad-dalu’r arian yr ydych wedi ei wario ar fesurau i wneud eich cartref yn gynhesach, a hynny’n gyflym.

Mae yna gynlluniau a gostyngiadau amrywiol ar gael, hefyd, ar gyfer pobl hyn a bregus, ac mae hyn hefyd yn medru helpu gyda chostau ynni.

Am help a chyngor pellach ar sut i arbed arian ar eich biliau ynni, gweler Arbed arian ar eich biliau ynni

Mwy o wybodaeth

Am fwy o wybodaeth ar ddefnyddio olew i wresogi’ch cartref, gweler Olew i wresogi’ch cartref – gorolwg

Am help a chyngor os ydych yn cael problemau gyda’r cwmni sy’n cyflenwi’r olew i wresogi’ch cartref, gweler Problemau gyda’r cwmni sy’n cyflenwi’r olew i wresogi’ch cartref