Garejys – cod ymarfer newydd - Yng Nghymru

Mae yna god ymarfer newydd i garejys, o'r enw Motor Industry Code of Practice for Service and Repair.

Nid oes rhaid i garejys gofrestru gyda'r Cod ond os ydynt yn dewis gwneud hynny, fe fydd yn rhaid iddynt ddilyn lleiafswm o safonau gwasanaeth ac atgyweirio, gan gynnwys:

• prisiau agored a thryloyw
• gwneud gwaith fel y cytunwyd
• anfonebau sy'n cyfateb i'r dyfynbrisiau
• staff cymwys a chydwybodol
• gweithdrefn gwynion syml a chyflym.

Os ydych yn defnyddio garej sydd wedi cofrestru gyda'r Cod, fe fyddwch yn medru:

• defnyddio llinell gyngor rhad ac am ddim i ddefnyddwyr
• cwyno ynghylch y garej a defnyddio gwasanaeth cymrodedd rhad ac am ddim neu wasanaeth cyflafareddu cost isel.

Os ydych yn cael gwasanaeth gwael gan unrhyw garej, fe allwch ddweud hyn wrth y corff sy'n goruchwylio'r Cod, Motor Codes Ltd. Nid oes gwahaniaeth a yw'r garej wedi cofrestru gyda'r Cod ai peidio. Fe fydd Motor Codes Ltd yn edrych i mewn i gwynion yn erbyn garejys sydd wedi cofrestru gyda'r Cod. Gellir codi dirwyon ar garejys sydd heb gadw at y Cod. Gofynnir i garejys sydd ddim yn aelodau gofrestru gyda'r Cod er mwyn gwella'u gwasanaethau.

Am fwy o wybodaeth ac i chwilio am garejys sy'n agos atoch chi ac sydd wedi cofrestru gyda'r Cod, rhowch glic ar wefan Motor Industry Codes Ltd yn: www.motorindustrycodes.co.uk.