|
Mae'r Lwfans Cyflogaeth a Chymorth yn fudd-dal newydd i bobl sydd â gallu cyfyngedig i weithio oherwydd afiechyd neu anabledd.
Daw'r Lwfans Cyflogaeth a Chymorth i gymryd lle Budd-dal Analluogrwydd a Lwfans Anabledd Difrifol, ond dim ond ar gyfer ceisiadau newydd a gyflwynwyd ar neu ar ôl 27 Hydref 2008. Mae hefyd yn cymryd lle ceisiadau newydd am Gymhorthdal Incwm a gyflwynwyd ar sail analluedd i weithio.
Os ydych yn hawlio Budd-dal Analluogrwydd, Lwfans Anabledd Difrifol neu Gymhorthdal Incwm oherwydd analluedd i weithio cyn 27 Hydref 2008, fe fyddwch yn parhau i gael y budd-daliadau hyn am y tro. Ond, fe fydd disgwyl i chi drosglwyddo at y Lwfans Cyflogaeth a Chymorth yn nes ymlaen. Ni phenderfynwyd ar y dyddiad ar gyfer gwneud hyn eto.
Fe fydd y rhan fwyaf o bobl sy'n hawlio Lwfans Cyflogaeth a Chymorth yn cael nifer o asesiadau i benderfynu a ydynt yn medru gweithio. Fe fydd un neu fwy o gyfweliadau â ffocws gwaith hefyd.
Fe fyddwch yn medru cael Lwfans Cyflogaeth a Chymorth am gyfnod cychwynnol o hyd at 13 wythnos. Yn ystod y cyfnod hwn, fe fyddwch yn cael asesiad i benderfynu beth ddylai ddigwydd i'ch cais ar ddiwedd y 13 wythnos. Os nad ydych yn bodloni'r asesiad, ni fyddwch yn medru aros ar Lwfans Cyflogaeth a Chymorth ac fe fydd angen i chi hawlio Lwfans Ceisio Gwaith yn lle.
Am fwy o wybodaeth ynghylch Budd-dal Analluogrwydd a Lwfans Anabledd Difrifol, gweler Budd-daliadau i bobl sy'n sâl neu'n anabl.
Am fwy o wybodaeth ynghylch Cymhorthdal Incwm, gweler Help i bobl ar incwm isel – Cymhorthdal Incwm.
Am fwy o wybodaeth ynghylch Lwfans Ceisio Gwaith, gweler Budd-daliadau i bobl sy'n chwilio am waith.
Am fwy o wybodaeth ynghylch y Lwfans Cyflogaeth a Chymorth, gweler gwefan yr Adran Gwaith a Phensiynau yn:  www.jobcentreplus.gov.uk.
Os nad ydych yn medru gweithio oherwydd afiechyd neu anabledd, efallai y bydd angen i chi gael cyngor gan gynghorydd profiadol, er enghraifft, mewn Canolfan Cyngor ar Bopeth. I chwilio am fanylion eich CAB agosaf, gan gynnwys y rhai sy'n medru rhoi cyngor drwy'r e-bost, cliciwch ar CAB agosaf.
|
