|
Mae'r wybodaeth yma'n berthnasol i Gymru, Lloegr a Gogledd Iwerddon
Dyletswyddau'r awdurdod lleol
Mae'n rhaid i bob awdurdod lleol warchod a hyrwyddo lles plant mewn angen yn ei ardal. Er mwyn gwneud hyn, mae'n rhaid gweithio gyda'r teulu i ddarparu gwasanaethau cynnal a fydd yn galluogi plant i gael eu meithrin o fewn eu teuluoedd eu hunain. Yng Ngogledd Iwerddon, mae gan yr Ymddiriedolaethau Iechyd a Gwasanaethau Cymdeithasol (yr HSST) ddyletswydd i ddiogelu a hyrwyddo lles plant mewn angen yn eu hardal.
Nôl i’r Brig
Pwy sy'n ‘blant mewn angen’
Caiff plant mewn angen eu diffinio o dan y gyfraith, fel plant sy'n iau na 18 ac:-
- sydd angen gwasanaethau awdurdod lleol i gyrraedd neu gynnal safon rhesymol o iechyd neu ddatblygiad
- sydd angen gwasanaethau awdurdod lleol i atal niwed sylweddol neu bellach i iechyd neu ddatblygiad
- sydd yn anabl.
Mae'n rhaid i'r awdurdod lleol gadw cofrestr o blant sydd ag anableddau yn ei ardal ond nid oes yn rhaid cadw cofrestr o'r holl blant mewn angen.
Nôl i’r Brig
Pa wasanaethau mae'r awdurdod lleol yn medru eu darparu
Gall yr awdurdod lleol ddarparu amrywiaeth o wasanaethau ar gyfer plant mewn angen. Gall y rhain gynnwys:-
- cyfleusterau gofal dydd ar gyfer plant o dan 5 sydd heb ddechrau'r ysgol
- gofal ar-ôr-ysgol a gofal yn ystod y gwyliau neu weithgareddau ar gyfer plant oed ysgol
- cyngor, arweiniad a chwnsela
- gweithgareddau galwedigaethol, cymdeithasol, diwylliannol neu hamdden
- cymorth yn y cartref a chyfleusterau golchi a sychu dillad
- cymorth gyda theithio i'r cartref ac oddi wrth y cartref er mwyn defnyddio unrhyw wasanaethau a ddarperir gan yr awdurdod lleol
- cymorth i'r plentyn a'r teulu gael gwyliau
- canolfannau teulu
- cymorth ariannol, fel arfer ar ffurf benthyciad, gweler isod
- gofal seibiant yng Ngogledd Iwerddon
- gofalu am y plentyn, gweler isod.
Gall yr awdurdod lleol ddarparu'r gwasanaethau canlynol hefyd i bob plentyn yn ei ardal, nid dim ond plant mewn angen:-
- cyfleusterau gofal dydd ar gyfer plant o dan 5 sydd heb ddechrau'r ysgol
- gofal ar-ôr-ysgol a gofal yn ystod y gwyliau neu weithgareddau ar gyfer plant oed ysgol.
Mae'n rhaid i'r awdurdod lleol gyhoeddi gwybodaeth ynglyn â'r gwasanaethau y mae'n eu darparu ar gyfer plant mewn angen a'u teuluoedd. Mae'n rhaid bod y wybodaeth yma ar gael i'r bobl a allai fanteisio o'r gwasanaethau.
Gogledd Iwerddon
Yn ychwanegol ar y gwasanaethau uchod, mae'n ddyletswydd ar yr Ymddiriedolaethau Iechyd a Gwasanaethau Cymdeithasol Lleol i ddarparu gwasanaethau y mae'n eu hystyried yn addas ar gyfer y plant canlynol:-
- plant anabl
- plant a allai, fel arall, fod yn ddarostyngedig i drefniadau gofal
- plant syn debygol o ymwneud â throseddau.
Cymorth ariannol
Gall yr awdurdod lleol roi cymorth ariannol mewn amrywiaeth eang o amgylchiadau, pan fydd plant mewn angen. Gallai'r cymorth fod ar ffurf benthyciad, arian parod, neu gyfraniad 'mewn da', er enghraifft talebau ar gyfer siop arbennig, neu eitem o fwyd, dillad neu ddodrefn. Gellir ond gwneud taliadau arian parod mewn amgylchiadau neilltuol ac os ydych yn gwneud cais am daliad, bydd yn rhaid i chi berswadio'r awdurdod lleol bod eich hachos chi yn un neilltuol.
Yng Ngogledd Iwerddon, mae gan Ymddiriedolaethau Iechyd a Gwasanaethau Cymdeithasol y pwer dewisol i ddarparu cymorth ariannol neu gmorth mewn da i deuluoedd er mwyn cwrdd â'i ddyletswyddau. Mae'n rhaid bod gennych blentyn sydd wedi ei asesu fel plentyn sydd mewn angen.
Os ydych am wneud cais i'r awdurdod lleol am gymorth ariannol, dylech ofyn am farn cynghorydd profiadol, er enghraifft, Canolfan Cynghori. I chwilio am fanylion ynglyn â'ch Canolfan Cynghori, gan gynnwys y rhai sy'n gallu rhoi cyngor drwy'r e-bost, cliciwch ar  CAB agosaf.
Nôl i’r Brig
Gofalu am blant mewn angen
Mae awdurdod lleol yn 'gofalu' am blentyn pan fydd yr awdurdod lleol yn trefnu i' plentyn fyw yn rhywle heblaw yn ei g/chartref.
Mae'r awdurdod lleol yn gallu gofalu am blentyn mewn dwy ffordd. Naill ai trwy 'ddarparu llety' neu lle mae'r plentyn yn destun gorchymyn llys.
Plentyn sydd mewn llety
Pan fydd plentyn yn cael ei r(h)oi mewn llety gan yr awdurdod lleol mae hyn yn drefniant gwirfoddol rhwng yr awdurdod lleol a'r teulu. Mae hyn yn golygu eich bod yn cadw eich holl hawliau a'ch cyfrifoldebau fel rhieni y plentyn ac nid yw'r awdurdod lleol yn cymryd unrhyw rai o'r hawliau na chyfrifoldebau yna. Os ydych yn riant, gallwch felly symud eich plentyn o'r llety ar unrhyw adeg.
Mae'n bwysig sicrhau bod llety ar gael i blentyn sydd ei angen am un o'r rhesymau canlynol:-
- nid oes unrhyw un â chyfrifoldeb cyfreithiol dros y plentyn; neu
- mae'r plentyn ar goll neu wedi'i (g)adael; neu
- ni all y person sydd wedi bod yn gofalu am y plentyn barhau i ddarparu gofal a llety addas am ba reswm bynnag.
Os yw'r awdurdod lleol yn darparu llety ar gyfer y plentyn, mae'n rhaid iddo lunio cynllun gyda'r teulu gan benderfynu ar y trefniadau a fydd yn cael eu gwneud ar gyfer y plentyn. Mae'n rhaid cael hyn yn ysgrifenedig.
Efallai bydd y plentyn yn byw mewn cartref maeth neu gartef i blant. Gallai'r cartref maeth fod yn gartref teulu neu ffrindiau'r teulu.
Mae'n rhaid i'r awdurdod lleol sicrhau bod plentyn sydd mewn llety yn parhau i gael cysylltiad gyda'r teulu a'r ffrindiau.
Plant y'n destun gorchymyn gofal
Pan mae llys wedi gorchymyn mewn perthynas â phlentyn, neu bennu gorchymyn gofal, mae hyn yn golygu y bydd yr awdurdod lleol yn cymryd cyfrifoldeb dros y plentyn ynghyd â chi fel rhiant. Bydd yr awdurdod lleol yn gwneud trefniadau ar gyfer y man lle bydd y plentyn yn byw, mewn trafodaeth gyda chi. Fodd bynnag, ni fyddwch yn gallu symud y plentyn os nad ydych yn cytuno â chynnig yr awdurdod lleol.
Yng Ngogledd Iwerddon, mae gan yr awdurdod lleol yr hawl i wrthod safbwynt rhiant os ydyw'n ystyried hyn yn angenrheidiol er mwyn diogelu neu hyrwyddo lles plentyn.
Am fwy o wybodaeth ynglyn â phan fydd plentyn yn destun gorchymyn gofal, gweler Plant a gofal awdurdod lleol.
Nôl i’r Brig
|
